Fampahafantarana

Ny ilo mby an-doha moa tsy fandraraka itany ka nasitriko tsy hahazo ny hahazo sehatra ny fisalasalana rehefa niangavian'ny namana Hantanoro, hanolotra ity boky ity ny tenako. Boky mirakitra amboaran-tsombintantara sy tononkalo, sanganasan'ny poeta Mpanoratra, andriambavilanitra, fantatra amin'ny anarana hoe Hantanoro amin'ny maha mpiangaly sorakanto azy.

Raha ny taona roa arivo i Hantanoro no niroboka teo amin'ny tontolon'ny zavakanto vita amin'ny teny, ary ny taona roa ambin'ny fol sy roa arivo no niditra ho isan'ny mikambana HavatsaUPEM, dia azo heverina fa poeta Mpanoratra tsy maika tsy faingana ny vehivavy, tsy irony mpitsatsainoka ho vantona fa mpilaika malako tsy tia rotoroto, misafidy ny hiadan-ko reniny; manamafy izany moa ny tsy fahamaikany hamoaka boky mirakitra ny tsanganasany madiodio raha tsy roa amby roapolo taona aty aorian'ny nirotsahany ho isan'ny mpikambana Havatsa-UPEM.

Raha voankazo ity ny Kiriko ho anao, ity dia ho nohariko amin'irony matoy ifotony efa fioty irony, mamy fitelina fankafy, tsy foy haloa; fa fafy sorakanto moa izy ity ka handeha hataoko hoe "Katsaka ela nihantonana ka niandry ny oran-kidona"... Tsy fandoka ny kanto: Handray ny Ny Kiriko ho anao ianao, satria ho anao sy ho ahy mihitsy moa izy ity, hanokatra ny boky, hitety hamaky an'ireo sinoratr'i Hantanoro, fa ny hoe mamaky moa dia efa mitsara rahateo no sady mitsiro, koa isaka izay mahavaky ary ianao, na rehefa mahavaky azy manontolo dia porofoy fa ny nahandro mahia, hono, mila menaka; ny zavatra matsatso no mila fanasina fa ny tsara tsy mila doka. Ilay Rafotsibe nangaron-daoka : sady tsy hilaza ny leminy no tsy hilaza ny tsirony... Hoy Fanja Razah.